Nagaland Class-X le Class-XII result suksuok

Posted by Lalremlien Neitham

Dimapur, April 30, 2014: Nagaland Board of Secondary School (NBSE) hnuoia HSLC le HSSLC exam result chu voisun khan suksuok a ni a, tukum result dungzui chun HSLC-ah nuhmei nekin pasal an thaw ṭha lem a, HSSLC-ah pasal nekin nuhmei an thaw ṭha lem ve thung.

HSLC exam-naah pasal 66.63% an hlawtling a, nuhmei 65.73% in an hlawtling vet hung. A pumpuiin nikum a result nekin tukuma result 2% velin an sang lem a, 65.19% anthok 63.52% a kaisang a nih. Hlawtling 14,131 hai laia 42.70% in 60% chungtieng an score. Sikul hlawtling hai lai-ah sikul 40 haia inchuklai hai chu 100% in a hlawtling a, sikul 26 vel a hai chun inchuklai hlawtling pakhat khom nei loin an hlawsam vet hung.

HSSLC exam-naah pasal nekin nuhmei inchuklai hai an thaw ṭha lema, nuhmei hai pass percentage chu 77.10 niin pasal hai chu 72.21% a nih. Nikuma nekin 60% neka tam score inchuklai an tam lem a, nikum khan 1,666-in 60% neka tam an hmu a, tukum 2,877-in an hmu a nih.

Top 10 hai lai, Arts le Commerce-ah pasal nekin nuhmei an thaw ṭha lem nawk a, Arts-a top 10 lak 12 hai laia 8 hai chu nuhmei an nih. Commerce-a khom top 10 mi 13 hai lai-ah nuhmei 10 an um bok a nih. Science-ah top 10 mi 11 hai lai-ah pasal 9 an ṭhang vet hung.





Blog, Updated at: 1:50 AM
© TLÂNGSAM. Powered by Blogger.