Mizoram MP le MLA inthlangna-ah Congress hrat ve ve

Posted by Lalremlien Neitham

Aizawl, May 17, 2014: Thla hmasak April 11-a Mizoram puola Lok Sabha ṭhungna ruok pakhat le Hrangturzo bye-election inthlangnaa vote tla hai tiemna chu zani India pumpui vote tiemna nei ruolin nei ve a ni a, Mizoram Congress party chun hieng MP le MLA biel pahni hai hi a rut ve ve a nih.

Mizoram MP inchuna a hin mi pathum an ngir a, chuonghai chu - Congress hmingin Lok Sabha MP nilai mek CL Ruala, AAP hmingin M. Lalmanzuala, eptu pawl hrang hrang inzomkhawm UDF hmingin Robert Romawia Royte hai hi an nih.

April 11-a Mizoram Lok Sabha MP inthlangnaa khan vote 4,25,710 a tla a, None of the Above (NOTA) 6410 a um bok a nih.

Mizoram MP dinga thlangtling CL Ruala (Congress) hin vote 2,09,573 a hmu a, Robert Romawia Royte (UDF/Independent)-in 1,9,8203 hmu ve'n, an kar-ah 1,1370 chauh a um a nih. AAP hminga ngir M. Lalmanzuala chun vote 11,515 chuauh a hmu ve thung.

CL Ruala vote hmu hai hi vote tla po po anthoka 59.25% a ni a, Robert Romawia vote hmu po po chu 44.68% a nih. M. Lalmanzuala vote hmu zat chu 2.70% a ni a, NOTA-a vote tla zat chu 1.50% a nih.

Lok Sabha inthlangnaa hin CL Ruala hi Assembly biel 22-ah a hrat a, Robert Romawia Royte chu biel 18-ah a hrat ve thung a nih. Robert Romawia Royte hi Aizawl khawpui sung bikah a hrat vong a nih.

Mizoram MP dinga thlangtling ani zo hin CL Ruala chun thuthar lawkhawmtuhai inhmupuiin, thlangtling ani na thu-ah lawmthu a hril a, "Mizo mipui hai ta dingin theitawpin sin thaw pei ka tih,” tiin a hril. A khingtu hnai tak UDF candidate Robert Romawia Royte chun CL Ruala tlingna thu-ah a lawmpui thu a hril a, ṭha taka ram ta dinga sin thaw dingin a ditsakna an hlan thu a hril bok a nih.

Hrangturzo Assembly bye-election a thlangtling Congress hminga ngir Vanlalawmpuii Chawngthu (k. 35) hin vote 6,721 a hmu a, UDF candidate Lalduhawma'n vote 4,218 a hmu ve thung. NOTA-a vote mi 135 le postal ballot-a vote thi 13 a um a, vote tla po po chu 10,939 a nih.

Vanlalawmpuii hi Mizoram-a nuhmei MLA laia palina a ni a, kum 1987 anthoka Mizoram-a nuhmei MLA hmasatak ala nih.

Hrangturzo biel hi Mizoram MLA inthlang hnuhnung taka khan Mizoram chief minister Lal Thanhawla ngirna le tlingna biel pahni laia mi a ni a, Lal Thanhawla’n Serchhip biel a thlang lem leia bye-election nei a nih.


Blog, Updated at: 2:48 PM
© TLÂNGSAM. Powered by Blogger.