Kum khat sunga Mizoram-a ram dang mi inzin 906

Posted by Lalremlien Neitham

Aizawl, May 07, 2014: Nikum April anthok tukum March sung khan ram puotieng anthoka Mizoram-a khuolzin mi 906 an um a, chuonghai lai chun USA anthok mi 184 hung inzinin rambung pakhat anthoka hung inzin rawnna tak an nih.

Mizoram home department hnuoia Foreigner Registration office sinsie danin, April 2013 le March 2014 inkara Mizoram-a ram dang mi hung inzin hai chu - American 184, British 109, Australian 66, Bangladeshi 64, South Korean 48, German 44, Israeli 39, Canadian 36 le French 27 an nih.

Hi sung hin tukum March thla kha khuolzin a hung lut tam ṭum tak a ni a, mi 130 an hung inzin a nih.

Mizoram-a lut ding hin ram dang mi ha’n Protected Area Permit (PAP) an lak a ngai ta naw a, amiruokchu, Afghanistan, Pakistan le China anthoka Mizoram-a lut ding hai chun PAP an lak ala ngai tho a nih.

Foreigner Registration Office-a sinthawtuhai hrildanin, kum 2013 anthok khan Centralised Foreigner Office hmang ṭan a ni a, Mizoram chu India hmarsak biela CFRO hmang hmasa pawl a nih.

Ram dang mi, dan bawsiet le misuol, India ram sunga State danga thuneituha’n an zong mek hai chu Mizoram-a hung lut an um chun, an hming, passport number le visa number hai chu CFRO computer-ah sut lut ani charin blacklist an ni chun anlang nghal ding a nih.

Tutak hin Mizoram sorkarin C-Form le S-Form hmang thei dingin hma an lak mek a. C-Form a hin hotel le restaurant neituha’n internet hmangin an mikhuol (ram dang mi) hai hotel-ah an lut char anthokin report thelut an ta, report a chun an fena ding, an fena san, an room number, an suok nawk hun ding le an fena an hriet hai po po hai an ziek hlak ding a nih.

S-Form a hin inchukna in-ah ram dang mi an um chun inchuklai hai chanchin kimchang, assessment an lakna performance report hai an hotu haiin internet hmangin CFRO-ah an report hlak ding a nih.


Blog, Updated at: 10:32 AM
© TLÂNGSAM. Powered by Blogger.