Jiri-Imphal inkara “Chakka Bandh” suktawp

Posted by Lalremlien Neitham

Imphal, May 14, 2014: Tiemchin umlo Imphal-Jiribam inkar lampui laia “Chakka Bandh” ko chu zani chawhnung khan bandh kotu Joint Forum for Transport Welfare (JFTW), Tamenglong le Manipur sorkar inbiekzoin suktawp a nih.

Inbiekna nei zo hin, JFTW secretary Daimei Joseph chun thuthar lakhawmtuhai inbepuiin, sorkar anthoka JFTW i ngen chu nguntaka hriltlangna nei a ni a, Manipur sorkar aiawtua ṭhang Manipur chief secretary PC Lawmkunga’n sorkar-in an thil ngen a ngaituo theina dingin kar hni sung hun pe dinga a ngen lei le tiemchinlo bandh chu suktawp hri dinga a ngen leiin bandh chu suktawp a nih, tiin a hril.

Bandh leia intang, Imphal pana fe ding thuomhnaw le hmangruo phur truck 500 vel hai chu voituk khan police venghimna hnuoia inlontir nawk an ni tah.

JFTW secretary chun, Chief secretary-in Tamenglong le Khongshang inkar lampui siemṭhatna sin thaw mek chu sorkar-in a enfel zo hnung-ah sin ṭul le mamaw dang um hai chu sorkar-in thawng a tih, ti bandh kotuhai kuomah a hril, tiin a hril.

“Kar hni sung hin Manipur sorkar-in an thil ngen a sukpuitling naw chun bandh hi sunzom nawk ning a tih,” tiin JFTW secretary chun a hril a, Manipur chief secretary-in Khongsang le Tamenglong inkar lampui siemna sin Manipur PWD kuta um chu BRO kuoma anhlan ani ding thu a hril niin thuthar lawkhawmtuhai kuoma chun a hril bawk.

“Chakka Bandh” hi May 7 anthoka nei ṭan kha a nih.

JFTW chun hun sawt tak anthoka Khongshang le Tamenglong district headquarter inkar lampui km 39 a sei siemṭha dingin Manipur sorkar a nor a, tuchen hin siemṭhat ala ni naw zing leiin an lungawinaw inentirna’n “chakka bandh” hi an ko a nih. Hi bandh hi Tamenglong-a pawl hrang hrang hai khomin an thlop bok a nih.


Blog, Updated at: 11:11 PM
© TLÂNGSAM. Powered by Blogger.