Buhchangphai-a In suksiet bawl ṭhat

Posted by Lalremlien Neitham

Aizawl, May 17, 2014: Mizoram le Assam ramri Kolasib district huom sunga Buhchangphai Ramthar zau-a leilet enkoltuhai chengna In, Assam police le forest mi haiin an suksiet chu zani hmasak khan YMA hai hnatlangin an bawl ṭha pek niin ei thu lakna chun a hril.

Leilet enkoltuhai hi Vairengte SDPO Lalrohlua inrawina hnuoi-ah 1st IR police haiin riekchilin an veng bok a nih. An chengna In suksiet hai hi kar hmasak khan bawl ṭhat tum a ni a, amiruokchu khuo ṭhatnaw leiin ṭhul kha a nih. Zani hmasak khan mi 200 vel hnatlangin an bawl ṭha pek nawk a nih. Buhchangphai branch YMA huoihotnaa hnatlanga hin Buhchangphai khaw mi hai bakah, Bilkhawthlir le Phaisen khuohai anthokin mi iemanizat an ṭhang bok a nih.

In suksiet hai bawl ṭhatna ding hin Mizoram home minister R. Lalzirliana-in thla hmasak April 30 khan In neitu pahni hai kuomah Rs. 30,000 le rangva bundle thum ve ve a pek kha a nih.

Leilet enkoltuhai hai hi April 23 khan Assam police le forest mi haiin suok dok dingin an vau a, April 27 khan an In hai an suksiet pek a nih. In suksiet hai hi Buchangphai le a sevela khuo mi hai chun hnatlangin April 29 khan an bawl ṭha pek a, amiruokchu an bawlṭhat sawtnawte hnungin Assam police hai chun an ṭhiek pek nawk nghal kha a nih.


Blog, Updated at: 10:40 AM
© TLÂNGSAM. Powered by Blogger.