BTAD buoinaa thi zat mi 39

Guwahati, May 07, 2014: Zani khan Bodo Territorial Autonomous District (BTAD) huom sunga Baksa district-a Beki vadung anthokin mithi ruong 7 hmu belsa nawk a na, tu chena buoina suok leia thi zat chu 39 an tling ta niin ei thu lakna chun a hril. BTAD-a IGP hrildan chun, Baksa a hin ruong 32 hmu an taa, 7 dang hai chu Kokrajhar anthok niin a hril.

Hienglai zing hin National Investigation Agency (NIA) chun BTAD buoina lei hin thubuoi iengkhom siem an la nei naw a, May 3-a Govardhan police station huom sunga Narayanguri le Nankekhagrabari khuo haia buoina suichieng dinga beisei a nih. Hieng khuo pahni haia hin ruong 26 zet hmu a ni a, thubuoi pathum siem ani ta thu ei thu lakna chun a hril.

Assam home department anthokin dan ang taka fielna a hmu hnung-ah NIA chu BTAD-ah lut chauh dinga ti a nih.

Assam sorkar khomin thusuok siemin, buoina a re deuh ta niin an hril a, Baksa le Kokrajhar district a hai police picket 36 siem ani thu an hril bawk. Buoina hmuna curfew puong khom inthlazal ani ta thu hril ani bawk.