Assam director-general of police Khagen Sarma chun police headquarters-ah thuthar lakhawmtuhai hmuin, hieng mi 9 helpawl hai hming hi a tarlang a, NDFB (S) hotu chairman IK Songbijit, general secretary Swarangra le commander B. Bidai hai inthawtir niin a hril a, “NDFB (S) hai hi BTAD-a khuo pathum beiseinaa an ṭhang ngei a, thloptu le ṭhangpuitu dang an nei am ti sui mek a nih,” tiin DGP chun a hril.
Police hai chun liemtah May 1 le 2-a Baksa district huom sunga Narayangui le Khagrabri khuo hai beina a khan NDFB (S) hai an ṭhang niin an hril a, hienglai zing hin a khuo mi hai chun BTAD rorelna chel mek Bodoland People’s Front (BPF) helpawl hlui le Bodo Liberation Tigers (BLT) hel hai thaw a nih, tiin an hril ve thung.
Pawl tamtak chun BPF-in BLT hel hlui hai hmangin Kokrajhar Lok Sabha biela ngir ve ULFA hai commander hlui Hira Sarania vote hai chunga phuba lakna’n an inthawtir niin an hril. Sarania hi Bodoland State dodaltu Bodo hnam nilo haiin an ṭan nia hril a nih.
Police hai chun BTAD-a buoina suok le inzomin mi 27 an man taa, Assam sorkar ngenna angin hi buoina hi National Investigation Agency (NIA) haiin an suichieng mek a nih.
DGP chun, “Sakhuo le hnam hrang hrang umna hmun deua hai venghimna sie a ni taa, Bhutan le Bangladesh anthokin helpawl an hung lut nawna dingin SSB le BSF hai khom inralring dinga inhriettir an ni tah,” tiin a hril.
Lok Sabha inthlangpuinaa vote tiem le puong ani hun-ah buoina a sosang nawk ring an leiin venghimna khauh taka siem ani ta thu DGP chun a hril bawk.
Assam sorkar khomin India sorkar laipui kuomah venghimna sin thaw dingin sipai company 50 a ngen belsaa, hieng baka hin sorkar laipui chun Assam-ah venghimtu company 31 tir lut a tum bok a nih.
