Thawṭan zan khan Assam health minister Dr. Himanta Biswa Sarma chun chief minister Tarun Gogoi chu a In-ah inhmupuiin thuthlukna an siem niin ei thu lakna chun a hril.
Dr. AK Adhikary hi kar hmasak laia AMCH-a ward boy Kero Mech in post-graduate medical student Sarita Toshniwal a thatna le inzoma ban a nih. Inthatna thubuoi suichieng dingin CID kuoma inhlan ani bak-ah, Assam sorkar chun PP Verma inrawina hnuoi-ah one-panel indinin, ni 15 sungin a hmu dan thelut dingin a ti bok a nih.
Hienglai zing hin AMCH a inchuk junior doctor 450 le undergraduate medical student 600 vel hai chun tawpchin neiloin nuorna an la nei zinga, tuchen hin venghimna an i phut pek an la ninaw thu an hril.
Health minister khomin zani khan AMCH sirna a nei a, inchuklai hai kuoma chun an thil phut chu pek an ni ding thu an tiem nia hril a nih.
AMCH hai nuor hun sung hin junior doctor hai hin outpatient hai an en naw a, emergency a umhai ruok chu an en a nih. Hi sung hin undergradute hai chun regular class an kai naw bok a nih.
AMCH Junior Doctor’s Association president Hridoy Haloi chun, “Addl. Senior SP khom kan hmu a, venghimna pek dingin an tiem a, amiruokchu, iengtikam pek kan ni ding thu a hril thei nawh,” tiin a hril.
Junior doctor pakhat chun, “Venghimna pek an ni thei hun ding Addl. SSP in a hril thei naw leiin tiemchin umloin nuorna nei sunzom ning a tih,” tiin a hril bawk.
Haloi chun, “Undergraduate medical student hai hi Narakashur Hills hnuoi laia hostel-a um an ni leiin, hostel fena ding lampui hi a him naw leiin, venghimna pek an ngai a nih,” tiin a hril bawk.
Inchuklai pakhat chun, “Venghimna ṭhalem kan mamaw a, campus sung-ah zalen takin misuol an invak hlak leiin CCTV hai khom sie a ṭul a nih,” tiin a hril.
AMCH-a junior doctor le inchuklai hai nuorna hi ni 4 a tling taa, damnaw inentirhai khomin harsatna namenlo an tuok niin ei thu lakna chun a hril.
