AMCH-a doctor inchuklai thattu nia ring hrentang

Posted by Lalremlien Neitham

Dibrugarh, May 17, 2014: Assam Medical College & Hospital (AMCH)-a doctor inchuklai nunghak pakhat Sarita Tasniwal thatna thubuoia inhnamhnoi nia ring Dr. Dipmoni Saikia chu May 14 zingkar khan Police haiin thukhawchang an indonfie hnungin man a nih.

May 9-a Sarita Tasniwal thattu AMCH-a ward boy Kiru Mech inpuongna le hrepuitu ṭhenkhat hai hrildan chun Saikia hi Sarita thatnaa khan an hnamhnoih nia a hril leiin Police hai chun Saikia hi an man a nih. Sarita thattu Kiru Mech hi a tuolthat ni vek khan Police haiin an man a nih.

Superintendent of Police Rana Bhuyan-in thuthar lawkhawmtuhai kuoma a hrildan chun, thla khat liemta khan Saikia hin Sarita that dan ding a phierruk ta niin a hril. Saikia le Sarita hai hi AMCH obstetrics and gynaecology department-a inchuk hmunkhat an nih. SP Rana Bhuyan chun, “Saikia hin ward boy Kiru Mech chu a sin sukdet pek dingin an tiem a, tuol an that tir tumnaa khom kong dang danga inthokin ṭhangpui dingin an tiem bok a nih,” tiin a hril.

Police hai hrildan chun, Sarita that ding tuok a zani khan Saikia chu night duty pek a ni a, amiruokchu hrillawkna iengkhom umloin duty-ah a fe naw niin an hril. Amiruokchu, a zing-ah ward boy hin department suoksana matron kuoma duty register pek dinga a fe chun Blood Bank kawllai Saikia le chun an inbiek a. Saikia-in Kiru Mech chu nurse dang hai an um le umnaw thu an don a, an thil phierruk chu thaw thei ani ding le ding naw thu khom an don bok a nih. Kiru Mech chu department-ah a kir nawkin nurse dang hai an umnaw a sukchieng niin police hai chun an hril.

Kiru Mech inpuongnaa inthoka police hai hrildan chun, Kiru Mech le Saikia chun Sarita chu an pahniin an rak hlum niin an hril. “Saikia chu kutbawm thuohni bunin department hnungtieng NRHM kotkhar anthokin a lut a, Sari chu duty room khum-ah a chawl hadam laiin Saikia le Kiru Mech hai pahni chu indotin duty room-ah an lut a. Kiru Mech chun blanket la-in Sarita hmai a chun namde'n rak hlum a tum a. Hienglai hin Saikia chun Sarita ke alo chel a nih. Sarita chu voikhat a khek suok hmana, Kiru Mech chun a kut khingtiengin a bau a hup pek a, khingtiengin a rak a nih,” tiin police hai chun an hril.

“Mi hung ri an hriet leiin Saikia le Kiru Mech chun Sarita chu khum anthok hnuoi-ah an zawn tlaa, Kiru Mech chu Sarita awm-ah inṭhungin Saikia khom chu a phing-ah an ṭhung bok a nih. Hun sawtnawte hnunga Sarita a chang ta naw phing chun Kiru Mech chun Sarita a thi sukchiengna dingin a ring-ah surgical blade a sun luta, Saikia khom chun stethoscope hmangin Sarita thi le thi naw chu a ngaithla bok a. A thi an chieng hnungin Sarita ruong chu khum-ah zawnkai nawkin a in angin an inzaltir nawk a nih,” tiin police hai chun an hril. “Sarita an that hnung hin Saikia chun a kutbawm bun chu hlipin, lekhapuona tuomin department hnungtienga inthok bok chu a kir nawk a nih,” tiin police hai chun an hril bawk.

Police haiin Saikia kuoma thil an indonfie chun, Saikia chun an hnamhnoi naw thu hrilin, tuolthatna thubuoia hin keilut ani lem thu police hai kuoma chun a hril a nih. Saikia hi court hmaa inngirtir niin police hai kut-ah ni 7 sung hrentang dingin court chun phalna a pek a nih.

Sarita that ani nasan hi hrietchieng ninaw sienkhom, police hai hrildan chun, Saikia le Sarita hai mobile phone anthokin an kar-ah iemani a um nia hriet a ni a, thla khat liemta anthok khan an kar a buoi niin an hril. Police hai ringdan chun, inngaizawngna thubuoi leia Sarita hi that ni dingin an ring thu an hril bawk.

Kiru Mech-in thuthar lakhawmtuhai kuoma a hrildan chun, a hma angin Saikia le Sarita hai chu an inpawlngei ta naw a, an kar-ah thubuoi a um niin a hril. “Saikia kuomah Sarita that a nuom nasan kan donin, Saikia chun ka hriet a ṭul nawh,” tiin Saikia chun a don niin Kiru Mech chun police hai kuomah a hril.

Sarita thatna thu le inzomin AMCH-a medical student hai chun tuolthattu chu tukhom nihai sien man ngei ding le hrem ni ngei sien tiin an hril a. “Doctor pakhatin a doctor chanpui pakhat a that chu kan ngaituo khel thil a nih. A tuortu (thinu) in justice a hmu ngei theina dingin ṭhang kan lak a ni a, Saikia hi thiemnaw inchangtir ani chun dan hma-ah a ngir ngai a tih,” tiin an hril.

AMCH College Students Union president Dr. Rananjay Sharma chun, an nuorna siem chu suktawp la ninaw sienkhom duty le class hai an kai sunzom nawk ta niin a hril.


Blog, Updated at: 4:06 AM
© TLÂNGSAM. Powered by Blogger.