Aizawl, April 13, 2014: Mizoram Public Service Commission (MPSC)-in kum 2008 anthoka Mizoram Civil Service (MCS), Mizoram Police Service (MPS), Mizoram Information Service (MIS) le Mizoram Finance and Accounts Service (MF&AS) exam a buotsainaa tlinghai lai Sociology subject latu an la tam taka, Mizo subject latu’n anzui.
RTI Act hmanga zawna sangnaa anziekdan chun, kum 2008 anthoka MPS ding MPSC-in a lak anthoka Combined Examination 2013 chen khan MCS-ah mi 45, MPS-ah mi 35, MIS-ah mi 10 le MF&AS-ah mi 10 lak an ni tah. Kum 2008-a MCS lakna sinsiena ruok chu tarlang sa an nawh. MPSC competitive exam, optional paper um chi exam-a tlinghai lai Sociology subject latu mi 42 an um a, Mizo subject latu mi 25 an um.
Kum 2008-a MPS 10 lak hai lai Mizo subject latu an tam taka, MCS 2010-ah Mizo le Economics latu an tam taka, Arts subject la vong an nih. MPS 2010-a tling mi 10 hai lai mi 8-in Sociology an lak a, Science subject lak 3 an um. Combined Examination 2012-a tling mi 24 hai lai Sociology latu tam takin, mi 12 an nih. Combined Examination 2013-a tling mi 22 hai khom Arts subject la deu vong an ni a, Commerce subject latu pakhat a um ve.
MPSC chun tuhin Combined Examination 2014 nei dingin a buoipui meka, application form lak le thelut hun khom hong mek a nih. Application form hi April 30 chen khin thelut thei ning a tih. Tuta ṭum hin MCS le MPS 10 ve ve lak tum a ni a, optional subject pakhat chauh um tang a ta, subject thlang thei 30 um bok a tih.
MPSC exam-a tling Sociology subject latu tamtak
Blog, Updated at: 9:19 AM