Lakhipur MLA Goala fam a chang

Silchar, April 16, 2014: Lakhipur biela (Assam) Congress MLA nilai mek le Assam Minister hlui Dinesh Prasad Goala (k. 67) chu zing dar 3 vel khan damnawna leiin Medanta – the Medicity Hospital, Gurgaon (Haryana)-ah a nuhmei Moni Goala, nau pasal 2 Rajdip le Joydip le a naunu Deepmala hai maksanin fam a chang thu ei thuthar lakna chun a hril.

Goala sunghai hrildan chun, Goala chu lung tieng natna leiin Lakhipur-a Emanuel Hospital panpui a ni a, a na zuol pei leiin April 11 khan Silchar-a Valley Hospital an lutpui an nawk a, inthuk harsa a ti leiin ICU-a hai khom sie a nih. A hnungin Air Ambulance-in Gurgaon-a Medanta damdawi in-ah ṭhuoi niin enkol a na, voituk zing tieng khan a thuk alo tawp ta a nih.

Goala hi May 1, 1947 khan Dugrubasti, Palanghat-ah a pieng a, Pailapool-ah school kaiin Government Boys High School anthok matric a zo a, Janata College-ah intermediate thawin Gauhati University anthok political science lain graduation le post-graduation hai a zo a nih.

Kum 1975 khan political science lecturer sin chu Nehru College, Pailapool-ah a thaw a. Trade Union tieng inhnikin Barak Valley Tea Youth Welfare Society-a president sin a chel a, kum 1983-a Assembly election a khan independent a ngir ve-in, MLA-a thlangtling alo ni ta a nih.

A hnungin Congress party a zom a, Lakhipur constituency anthokin a zawnin voi 7 zet MLA a thlangtling a nih. Hieng hun sung hin Minister of State hai chen khom niin Power, PHE, Urban Development & Housing hai alo enkol ta hlak bok a, Assam-a Congress party-a senior politician ve a nih.

Goala ruong hi April 17 hin special flight-in Delhi anthok Silchar Airport vuongpui ning a ta, Pailapool, Lakhipur-a a chengna in-ah ṭhuoi ning a tih. Hi hnung hin Silchar tieng fepui nawk ning a ta, hunser hai neiin inthla liem ning a tih.

A ruong hi a piengna khuo Dugrubasti, Palanghat-ah raw ning a tih.

Goala hi Hmar nauhai ta dinga ṭangkai em em lo ni hlak a nih. BVHTD Council piengna ding le enkol pei theina dinga ban poimaw tak pakhat ve a nih. Kum 2006 lai vela PHE minister ani lai khom khan BVHTDC chairman ṭhungna ṭhenkhatin chairman nilai mek hrietpui loin BVHTDC umna minister kuomah hekna siemin chairman nina an inchupui lai khom khan Goala hin TV a hai chen Hmar hai ṭanin, “Hienga thil a um chun Hmar hai hmakhuo ding a harsa ding a nih. Chun, ka biela um ani leiin ka hrietloa hienganga hmalakna a um hi ka lawm naw a nih,” ti chenin Hmar hai alo ṭan ve a nih. Hmar le Dimasa buoi lai khom nasa taka inlang loa Hmar hai ṭantu niin, Assam-a Hmar haiin Modern Indian Language (MIL) an nei theina ding khoma hmangruo ṭangkai tak khom alo ni nghe nghe a nih.