Aizawl-ah bomb sukpuok

Posted by Lalremlien Neitham

Aizawl, April 19, 2014: Zirtawpni April 18 zan dar 11 vel khan Aizawl-a Chaltlang Muanveng-ah hmelhrietlo haiin bomb an sukpuok a, thi le hliem an um naw a, tu chen hin bomb sukpuoktu ni dinga ringhla man an la um nawh. Bomb puokna hi Mizoram power & electricity-a EE R. Lalchhanhima le Dr. Ramfangzaua hai In inkar lai a nih.

Hi thil tlung sawtnawte hnungin Bawngkawn Police hai chu a hmuna an thlung nghal a, thil umdan enfie nghalin bomb puokna hmun anthok hin bomb fuse le a kawrhai hmu a ni a, bomb hmang hi Gelatine nia ring a nih. Police hai baka hin forensic tieng hai khomin an enfie nghal niin ei thuthar lakna chun a hril. Hi thil tlung le inzom hin Bawngkawn Police Station-ah thubuoi zieklut a nih.

Thu dong danin, bomb sukpuok ani hnung hin bomb puokna thlang laia umhai chun mi pakhat t-shirt var hak an tlan an hmu thu an hril a, tu chen hin bomb sukpuoktu ni dinga ringhla man an la umnaw a, thu indon fie dinga police haiin an ko khom an la um nawh. Bomb puokna hmun laia chenghai khomin mi ringhla ding an hrietnaw thu an hril bawk.

Hi zana bomb sukpuok hin R. Lalchhanhima hai In bang tile le tukver darthlalang hai a suk koi nasa hle a, a sung tienga tile inthuona plywood khom a sie nuol bawk. R. Lalchhanhima hai In bang tile hi phek 12 zet thlak ngai khopin bomb hin a suksiet a nih. Hieng baka hin Dr. Ramfangzauva hai In chung, sawng li-na chenin tukver darthlalang hai a koi nasa hle a, step lungrem khom feet khat vel a deng khok bok a nih.

Zirtawpni zana bomb puok tiemsain, tukum sunga Aizawl khawpuia bomb puok zat chu voi 4-na an taa, hieng bomb sukpuok hai hi Gelatine bomb vong nia ring an nih. Tukum January thla anthok khan thlatin ni 20 dan pei-ah bomb hai hi sukpuok nia sut a nih. Vangneithlak takin bomb sukpuok a hai hin hringna chan le hliem an la um naw a, a sukpuoktu hai ruok hi tu khom man an la umnaw nia hril a nih.


Blog, Updated at: 7:07 AM
© TLÂNGSAM. Powered by Blogger.