Mizoram Synod-in lampui hraw tum ṭhul

Posted by Lalremlien Neitham

Aizawl, July 03, 2014: Central YMA, MUP leh MHIP hai chun Mizoram Synod-in Mizoram Liquor Total Prohibition (MLTP) Act hlip an ditnaw inentirna dinga lam hraw le poster tar an tumnaa ṭhang ve dinga an fielna chu zani khan inṭhungkhawmin an ngaituo a, pawl hminga ṭhanglo dingin an rel. NGO ha’n pawl hminga an thlop naw ding lei hin Synod chun lawmpui hraw dinga a lo rel ta chu a sut nawk nghal a nih.

Thawleni zantienga Aizawl-a Synod Executive Committee (SEC) member inṭhungkhawmnaa chun, Mizoram sorkar-in MLTP Act hlip a tum ditnaw inentirna nei dingin an rel a, Mizoram-a NGO ṭhuoituhai khom inbepui nghalin an hmalakna ding hai thlop dingin an ngen kha a nih.

Synod-in a ngenna hai hi YMA, MHIP le MUP hai chun zani khan an hran sengin an committee-ah put lutin an ngaituo a; Synod-in MLTP Act hlip ditnaw inentirna a huoihot ding a hin pawl hminga ṭhang a rem naw’n an ngai a nih.

Central YMA ṭhuoituhai chun, YMA angin Synod thlop naw hai sienkhom YMA member hai chu kohran mi an nina anga Synod hmalakna an thlop ani chun a rem nawna a umnaw thu le harsatna a umnaw thu an hril a. MLTP act hlip chu ṭha an ti naw thu thusuok siemin, “Mizoram sorkar-in MLTP Act a fepui mek hi a hlawtling nawk zuol theina dingin hma la sien, zu le ruihlo hi YMA chun theitawp suo-in a do zui pei kan tih,” tiin an tarlang.

Thawleni zantienga SEC inṭhungkhawmnaa chun, lampui hraw dinga an rel chu NGO hai hin an thlop ve naw ding ani chun fethlengpui lo dingin an lo rel ta kha a nih.

Mizoram Synod ṭhuoituhai le tlawmngai pawl ṭhuoituhai chu zani zantieng khan Synod Committee Room-ah an inṭhungkhawm nawk nghal a, SEC-in lawpui hraw an lo rel ta chu ṭhul nawk dingin an rel ta a nih. Poster tar ruok chu SEC-in alo riruong ta angin fethlengpui an tum a, tuta kar sungin kohran tinin an huom sunga tar hman dingin inpei hman an tum a nih.


Blog, Updated at: 2:28 PM
© TLÂNGSAM. Powered by Blogger.