Mizoram-ah MLTP Act thlakna ding bill pass

Posted by Lalremlien Neitham

Aizawl, July 11, 2014: Zu khap burna dan Mizoram Liquor Total Prohibition (MLTP Act), 1995 thlakna ding Mizoram Liquor (Prohibition & Control) Bill, 2014 chu zani khan Mizoram Assembly House-ah pass alo ni tah.

Bill put luttu Mizoram excise & narcotics minister R. Lalzirliana chun, "Ei ram hi zu-in a sukbuoi naw State a ni ei dit leiin MLTP Act hmangin sukrem ei tum a, ei hlawsam a nih. Chu dan chu ennon a, MLPC Bill, 2014-a thlak ei tumna hi mi ṭhenkhatin zu suk zalen tumna-ah an ngai hi sorkar ngaidan a ni nawh. Ei sukrem thei naw leiin thununna hnuoi-ah sie ei tum lem a nih," tiin a hril a; MLPC hmang a ni ding leiin a ṭha naw zawnga ngaidan lo siem ringot chu thil indik a ninaw thu a hril bawk.

MLTP Act hnuoi-ah zu ṭhalo leiin mi tam takin nunna an chan ni a hrilin, R. Lalzirliana chun, "Zu ṭhanaw hin hrisel nawna nasa tak inthlungtirin, zu khap hma nekin zu leia damdawi-ina lut an tam lem ti hriet a nih. MLTP Act hi lo hlawtling ta sien ei ram le khawtlang khom an hoi pha ding ti a chienga, chu chu ei duthusam khom a nih,” tiin a hril.

Excise minister hril danin, MLTP Act chu hmang ṭan tirin hlawtling vieu sienkhom, sinthawtu indainaw lei dam, mi an man hai an intang sawtnaw lei dam le jail indainaw lei damin hun sawt deu hnung-ah zu a tam nawk hle a; tlawmngai pawl hai khomin do-in hma la hai sienkhom excise le police hai zu man a pung tuol tuol a nih, tiin a hril.

MLTP Act a umnaw leiin zu zalen taka a umnaw ding thu hrilin, R. Lalzirliana chun, “An chawktu ding fel taka bithliin, vantlang hmuna dawn le inrui hai chu tuta hma neka khuokhir nawk zuol tum a nih. Zu ṭhanaw inhnar thu ka hril ngai naw a, zu ṭhanaw dawn hlak hai kuomah zu ṭhalem dawn lem dinga ditsakna chauh a nih. Mi po po zu dawnna dinga dan thar hi buotsai a ni nawh,” tiin a hril.

R. Lalzirliana chun, zu zor a ni khomin mi pakhatin a nuom zat zat a’nchawk theinaw ding thu hrilin, “Zu dawna inrui a, mi dang ta dinga harsatna a siem chun dan hmanga man thei a nih. Man ta phot hai chu poisa iemanizat inchawitir le lung-in intang amani, a pahni hai hmanga hrem thei an nih,” ti a hril a. Zu leia harsatna siem hai man chungchang-ah police le excise bak-ah NGO hai an ṭangkai ding thu a hril bawk.

Assembly House-a MLPC Bill chungchang hriltlangna a hin sorkar cheltu pawl member 19 le eptu pawl member 6 in thu an hril a; sorkar cheltu member haiin an thlop thu an hril vong laiin eptu member hai chun MLTP Act la hmang zinga, khauh nawk zuola kenkaw an dit thu an hril ve thung. Bill pass-na a hin eptu member hai chu an um nuom naw leiin Assembly House anthok an suok dok a nih.

Mizoram-a zur khap burna dan MLTP Act 2005 hi February 20, 21997 anthok khan hmang ṭan a ni a; kum 17 zet hmang a ni hnungin thlak a hung ni ta ding a nih.

Hienglai zing hin Mizoram chief minister Lal Thanhawla chun, "Kohran poisoi kan tum naw a, kan khing nawh. Mi ṭhangpui ding le ṭongṭai pekna kan hni lem a nih," tiin Mizoram-a zu khap burna dan MLTP Act siem ṭhat tum chungchang a hrilfie.

Zanita Assembly House-a MLPC Bill hriltlangna hun kharna-ah thu hrilin, chief minister chun, "Hi bill kan put lut hi kohran thu awinaw kan ni naw a, sorkar anga kan thaw ding, ram le hnam ta dinga ṭha a kan ngai a ni a, huoisen takin kan fepui el a nih," tiin a hril.

Chief minister chun, "Hi bill-in a tum chu zu zor an naw a. Zu dawn naw thei naw, a ruka dawn hlak, zu ṭhanaw dawn hlak, hieng hai hi iengtinam san thei kan ta ti kan ngaituo lem a nih. Hi bill-in a kawk chu kohran mi, ram leilung nau hai an nih,” tiin a hril.

Bill an put lut nasan hrilin Lal Thanhawla chun, "Ram le hnam ta dinga ṭhalem anga kan ngai a ni a, huoisen takin kan fepui el a ni a. Huoisen takin kan ensin ding a nih,” tiin a hril a, an fuk naw chun sut nawk thei a ni thu a hril bawk.

Mizo mipui chu zu inrui ngai thei lo hnam nisien a dit thu a hril a, zu inrui khing thienglo anga ngaina chu sukbbo a hun ta hle thu a hril bawk.

Chief minister chun MLTP Act hlip chungchang-ah, "Pathien poisoi hi kan ti em em a, Pathien poisoi nawna dingin ṭongṭai khom kan ṭongṭai ve a, chuleiin kan tum tak chu Bill hi Act a hung ni hnungin ei ram le hnam hin khawvel hnam changkang kalphung inchuk pei sien ti hi a nih. Zu buoipui em em hnam ni hi inzak a um a, buoipui lo tak hnam ei ni theina dingin hi bill hi a ṭangkai ka ring,” tiin a hril.

Kohran-in MLTP Act hlip a ni nawna dinga ṭongṭaina an rot chungchang hrilin, Hawla chun, “Ṭongṭai ruol hai khom hi a ṭha, lungruol lo taka ṭongṭai ruol hi a dai sawt ngai naw a, ei hni an ang a ngai,” tiin a hril a, Congress sorkar chu 1997-a MLTP Act an hmang hnung 1998 inthlangna-ah an tla nghal thu a hril lang bok a nih.

Chief minister chun politics-a hlawkna tieng um loa ram le hnam ṭhatna ding lem thlirin huoisen takin an fepui ti a hril a; ensin a ni hnungin a ṭha naw chun sukdanglam thei a ni thu a hril bok a nih.


Blog, Updated at: 12:57 PM
© TLÂNGSAM. Powered by Blogger.