HSA Shillong-in Freshers Orientation-Cum-Exam Pass lawmna

Posted by Lalremlien Neitham

Shillong, July 6, 2014: Vawisun khan HSA Jt.Hqrs., Shillong chun EFCI Fellowship Hall, Hebron, Madanryting hmun-ah Fresher's Orientation -cum- Exam Pass Lawmna an hmang a, nu-le-pa le inchuklai ṭhahnem tawk tak an fekhawm.

Hi hun hi Nk. Mercy Darthamawi in keihruoiin, hun hmasa tieng Shillong hmuna lekha inchuk dinga hung thar (Freshers) hai inhmelhreitna le lawmlutna hun nei a ni a, Rev. Lalngaizuol in Freshers hai ta dinga tawngtaipekna a nei bakah Exam a hlawtlingna changhai ta dingin Pathien kuoma lawmthu hrilna hun a hmang.

Hi hun a hin HSA Gen.Hqrs., President, Pu Lalthlamuana Hmar, HYA Jt. Hqrs. President, Pu Rohminglien Buhril, IFS le HSA Shillong President, Tv. Brando H. Keivom le Advisers-hai a’nthawkin Shillonga student inenkawldan, khawtlang inthuoidan, studenthai mawphurna le infuina thucha tha tak tak an hril a nih.

HSA Shillong President chun HSA Platinum Jubilee kum ani leiin HSA Jt.Hqrs., Shillong chun a hran takin Fresher’s Meet -cum-Annual Conference kum tina a huoihawt hlak chu nei lo dingin a hril a, hi ai hin Meghalaya pumpui huopin HSA Platinum Jubilee lawmna hun 4th October, 2014 khin hmang lem dingin nasa taka an insingsa mek thu a hril.

Hienghai bak a hin HSA Joint Headquarters, Shillong hnuoia Unit pahni indinthar a um - Rakhen Unit le Sawrtui Unit a thuoitu thar thlangtlinga um haiin Oath-taking na Rev. Lalnghatlien Songate keihruoina hnuoia an nei a nih. Thuhrilna hun karlaka Tv. Isaac Lalmalsawm Songate, Nk. Jennifer Nianglawmkim le Nk. Herlyn Sinate haia inthawkin hla ngaithlakna hun hai nei a ni bawk.

Hun khar ṭawngṭaina Upa Lalngatlien Sungte-in a nei zoin, HSA Shillong in refreshment a buotsai chu fak ani zoin hun hmang zo a nih.

Source: Virthli


Blog, Updated at: 9:23 PM
© TLÂNGSAM. Powered by Blogger.