Tuiṭhaphai, June 19, 2014: Zani khan helpawl Zomi Revolutionary Army (ZRA) hai chun Tuiṭhaphai New Lamka-a Saulim Restaurant hnaih lampui sir laia bomb a um nia thuthang thedartu mi 2, Bungmual khawmi Thangthianmuang (k. 20), Siloam Veng le Khuppu (k. 24), Zoar Veng hai chu an man niin ei thu lakna chun a hril.
Hieng mi 2 hai hin chawhnung dar 1:50 vel khan lampui sir lai bomb a um niin thuthang an thedar a, hun sawtnawte hnungin police mobile team hai khom hienglai hmuna hin an tlung nghal a nih.
Churachandpur SP K. Kabib hrildan chun, police mobile team hai tlung hnung sawtnawte hnungin ama khom a tlung ve nghal a, bomb nia an hril a enchieng hnung chun ‘rechargeable battery’ mei mei ani thu a hril.
ZRA chun mipui sukthlabara thuthang thedartu ni dinga an i suidok hai chu an hrentanga; hieng mi hai hin mi hmulo lai bomb anga thuthang an i thedar chu anni sie ngei ani ti inpuong suokin, an thil siena hmun anthokin fe hmangin a hnungin an siena hmuna bok chun kir nawkin thuthang an thedar niin an inpuong bok a nih.
ZRA chun an i man mi 2 hai chu chanchinbumihai hma-ah inlangtirin, mipui sukthlabar thei thil hiengang thuthang hi tu khomin ching talo dingin a vau a, hmatieng peia a thaw sunzomtu an la um rop chun na taka hrem ning an tih, tiin an hril.
Home» Bomb Hoax» Churachandpur» Insurgency» Manipur» Zomi Revolutionary Army» ZRA-in thuthang thedartu mi 2 man