TSA-in lawmthu hril, intumna thu-ah hrilfiena an siem

Posted by Lalremlien Neitham

Imphal, June 30, 2014: Thadou Students’ Association (TSA), GHQ chun thusuok siemin, zani hmasak zana bandh an ko lo thloptu pawl, abikin Siamsinpawlpi, hai chunga lawmthu an hril a, hmatieng peia khom mimal le pawl haiin an thlop pei an beisei thu an hril bawk.

Bandh nei hun sunga TSA mi haiin Hills’ Today magazine Editor chunga kut an thlakna thu a Churachandpur Kuki Students Organisation (KSO)-in demna le intumna an siemna-ah hrilfiena siemin, hi thil a tlung lai hin Imphal anthoka Moreh pan Alto car sen, a hmaa PRESS inziek, a sunga pasal 3 le nuhmei pakhat inṭhung chu bandh thloptuhai chun lo dangin an fena ding an indon a; Hills’ Today magazine Editor anga inhril-pa chun alo dang chattuhai chu panin Haolenphai khuo-ah chanchin lak khawm ding an ni leiin infetir dingin a ngen a, bandh thloptuhai chun a press identity card inentir dinga an tiin an entir thei naw a nih, tiin TSA thusuok chun a hril.

Editor inti-pa hin chanchinbu le inlaichinna neilo car sunga chuong hai le chun fethleng ṭal a tum a, thukhawchang an indon lai car sunga nuhmei chuong ve chun bandh thloptuhai chu umdan mawilo tak le ṭong ṭhaloin a biek tawl leiin an car chu suksiet pek a nih, tiin TSA thusuok chun a tarlang bawk.

"Hi thiltlung hi bandh chanchin ziek dinga hung ve thuthar lakhawmtuhai khomin an hmu nghe nghe a nih," tiin an hril.

Mi tuelkhomin, hiengang mi, journalist inti ve bok si, ‘journalism ethics’ khom hrelo hi dem seng dingin TSA thusuok chun a hril bok a nih.

Hienglai zing hin pawl inza-um le mawphurna lientak nei Churachandpur KSO-in bandh thloptuhai laka thusuok an siem chu TSA-in poi a ti hle thu hrilin, thil ngirhmun hre hmasa phota thusuok siem ta hlak dingin thurawn a pek bawk.

TSA chun, Hills’ Today editor inti-pa hin TSA hmingsiet zawnga TSA le chanchinbu mihai kara inhrietthiemnaw siemna dinga thiltlung chungchang a her danglamna thu-ah vau-in, July 5 chen-ah hrilfiena a siem naw chun TSA chun Manipur sung-ah Hills’ Today magazine chu an khap ding thu an tarlang nghal bok a nih.


Blog, Updated at: 11:30 PM
© TLÂNGSAM. Powered by Blogger.