TN Foundation Meritorious Award sem

CCPur, June 7, 2014 (HT): Zani 11:00AM khan M. Songgel Community Hall, CCPur-ah TN Haokip Foundation huoihawtnain Meritorious Awards, 2014 semna nei a nih. Hi huna hin Z.Kikhonbou Newmai, Vice Chairman, Hill Areas Committee (HAC), Manipur khuollienin a ṭhang a, Mr Lalhmasawn, DI/Tipaimukh le R.L. Haokip, Principal, Greenwood Academy hai chu Guest of honour le special guest in an ṭhang.

Hi huna khuolllien Pu Z. Kikhonbou in thu a hrilnaa chun, vawisuna Awards dawngtu students hai chu Saikawt Assembly Constituency le nu le pa hai chawimawia sukhmingṭhatu an ni thu a hril. Lekhathiem ringawt hi a huntawk naw a, nungchang (character) ṭha nei a pawimaw. Iengangin lekha thiem inla khawm character ei inhmang tlat chun umzie a nei nawh. Tulai chu Computer khawvel le inelna khawvela cheng ei nita leiin College ṭha haia Admission hmu ding chun percent ṭha a ngai ta a nih tiin a hril a. Tuta ṭuma award la dawng pha lohai khawm tumru tak le nasa lema thaw dingin an fui. Inchuklai (students) hai chu ei ram le hnam lungphum le nu le pa hai ta dinga rohlu tak an ni thu hrilin hmatienga ei society ṭhuthmun ding chu tuta inchuklaihai liengkova innghat a ni thu hril.

Pu T.N. Haokip, MLA Saikawt A/C in thu a hrilnaa chun, Education um lova ram hmasawn le inṭhanglien a um ngai nawh. Science & Technology Age a um ei nita leiin Science le Mathematics hai chu compulsory a hung nita, chuongang bawkin Computer thiem lo chun tulai khawvela tukhawmin business lien tak an thaw thei ta nawh tia hrilin CCPur mipui a bikin student hai chu Science le Mathematics haia hma nasa nawk zuola la dingin an fui.

59/Saikawt A/C sunga HSLC exam, 2014 a Marks 457 ( 91.4%) hmutu Mr Obed Letlensang Haokip (St. Mary’s H/S, Tuibuong) s/o Rev. Onthang Haokip & Mrs Neilm Haokip of B. Vengnuom, CCPur chu All Round Topper Award inhlan a ni a, lawmmanin Rs. 20,000 le Certificate inhlan a nih.

Mathematics topper award chu marks 92 percent hmut Henry Lalchunghnung s/o (L) Lalsuongvel & Roselyn Lalremzo, Muolvaiphei, A/P Gilgal Children Home, Muolvaiphei; Mount Carmel School, Muolvaiphei a kai kuoma inhlan a ni a, lawmmanin Rs. 15,000 le Certificate inhlan a nih.

Science topper chu Science Subject-a Marks 83 ve ve hmutu- Mr Lunminthang Khongsai s/o Sehkhohen & Chinnei Khongsai of D. Phailien, CCPur, Salt Brook School, Tuibuong le Mr Isaac Lalthlawnpek s/o Lalnuntluong & Lalhlimpui, Saikawt Village (Mt. Carmel School, Muolvaiphei) a kai hai kuoma inhlan an ni a, lawmmanin Rs. 15,000/- ve ve le Certificates inhlan an nih.

School of the Year Award chu Greenwood Academy, B.Vengnuom, CCPur kuoma inhlan an nih. Greenwood Academy hin HSLC Exam, 2014 a khan 100 percent an passéd a nih. Lawmmanin Rs. 10,000 le Certificate inhlan an nih.

Award dawngtuhai hi Rev. Khup Do Khen, Pastor, Lamka MELC in malsawm ṭawngṭaipekna a nei.