Hi information centre hi United Nations Information Centre (India and Bhutan)-a Chief Information Officer Rajib Chandran-in a hong a, hongna hun a hin United Nations Resource Centre (North East) Executive Director Ashwini Kumar Sharma le Cachar Deputy Commissioner Gokul Mohan Hazarika hai khom an ṭhang.
Rajib Chandran chun United Nations Information Centre Library and Studies Centre chu khawvel hmun hrang hrang-ah hong ani thu hrilin, tuchen hin rambung 193-ah hong a ni taa, remna le muongna bakah hmasawnna le mihring chanvo humhal chu hi Centre thiltum bulpui tak ani thu a hril.
An Centre hong thar hi Barak Valley mipui haiin an sor ṭangkai ngei a beisei thu a hril a, United Nations Information Centre anthokin mipui haiin khawvel hmun danga thilthlung tamtak an hriet thei ding thu le Centre sirtuhai chu internet hmang dan inchuktir an ni ding thu a hril bawk.
Chief Information Officer Chandran chun Study Centre-ah hin thla 6 sung inchuk thei course dang dang hong ani ding thu le mark 100 phur exam an huoihot ding thu a hril bawk a, Silchar-a Centre hong thar hi India hmarsak biela a 14-na ani thu a hril bawk.
Cachar DC Hazarika chun Centre chu NIT, Medical College le Assam University-a inchuklai haiin an hmang ṭangkai ngei a ring thu a hril a, hi Centre hong huna fekhawmhai chu ṭangkai taka sor thiem dingin a fiel nghal bok a nih.
