Churachandpur KSO-in TSA bandh ko thlop lo

Posted by Lalremlien Neitham

CCPur, June 29, 2014: Zani zing dar 3 anthoka Thadou Students Association (TSA)-in darkar 24 aw ding Imphal-Dimapur, Imphal-Moreh, Imphal-CCpur lampuia bandh an ko chu Churachandpur-a Kuki Students’ Organisation (KSO) chun district sunga khawtlang hmakhuo ngaituo-in an thlop naw thu an puong.

TSA hai hin June 16-a Chaba Lukho-a IRB bus le Maruti Alto motor hai inbawnaa hliem tuok hai chu commandant pa’n a uksak naw tia an intum leia an nuorna inentirna’n bandh hi an ko a nih.

Churachandpur-a KSO thusuok-in a tarlang danin, Churachandpur-a Thadou inchuklai pawl an hrietpui TSA ti a umnaw a, Thadou Kuki Student's Union (TKSU) ruok chu a um a; TSA mi-le-sa nia inhril hai hi Kuki Inpi Churachandpur (KIC) thupek zawm nuomlo, buoina siemtu an nih, tiin a hril.

Churachandpur-a Kuki pawl inopna insangtak KIC chun district sunga TSA an um ti hi a hrietpui naw a, kum 2012 April 13-a Kuki tlawmngai pawl hrang hrang haiin thuthlung ziekin TSA chu ṭhiekin, TKSU chu an siem lem a nih, tiin KSO thusuok chun a tarlang bawk.

District sunga mipui nundan sukbuoi ani nawna dingin phalna bo le a hrietpui lo pawl hai bandh ko chu an thlop naw thu hrilin, bandh ko ni hi HSSLC compartmental exam nei ni ding ani bok leh, inchuklai hai sukbuoi pal an inlau leia bandh an thlop naw thu an hril bawk.

Inlau ang rengin Imphal-a compartmental exam pe dinga fe inchuklai hai chu TSA bandh thloptuhai chun Motbung le hmun dang-ah buoina an lo siem pek niin an hril a, tharum hmanga che bandh thloptuhai chu an dem hle thu an hril.

Hi lei hin KSO chun bandh thloptu hai chu bandh le inzomin iengkhom hma la lo dingin an suktawp pek a nih, tiin an thusuok chun a tarlang.

KSO chun motor chetsuolnaa thang sungkuo hai chu a tuorpui takzet thu a tarlang bok a, hi buoina siemtu police officer chu thuneituha’n vau ding le buoina fe sei hma’n hi chungchang thu hi an hma tienga sorkar-in sukfel ding le hliem hai chu zangnadomna pe dingin a phut thu KSO chun an hril.


Blog, Updated at: 2:05 PM
© TLÂNGSAM. Powered by Blogger.