Bru sungkuo 24 Mizoram-ah kir

Posted by Lalremlien Neitham

Aizawl, June 17, 2014: Tripura transit camp-a Mizoram Bru raltlana um hai chu zani anthok khan Mizoram an kir nawk taa, zani chawhnung dar 4 chen khan Kanhmun le Zomuantlang fecilitation centre-ah suongkuo 24 an tlung tah niin ei thu lakna chun a hril.

Bru kir hai hi Kanhmun le Zomuantlanga facilitation centre-ah sorkar thuneituha’n an lo hmuok a, Mizoram mi an ni le ninaw enfie nghal pei an nih. Facilitation centre-a hin NGO ṭhuoituha’n an lo hmuok bok a nih.

Zani chawhnung dar 4 chen khan Kanhmun facilitation centre-ah sungkuo 20 an tlung taa, an rengin mi 86 niin, puitling 56 le naupang 30 an nih. Asapara camp anthokin sungkuo 4, Naisingpara anthokin sungkuo 12, Kaskau anthokin sungkuo pakhat le Hamsapara anthokin sungkuo 3 an nih.

Kanhmun-a kir hai hi Mizoram-a an umna ding khuo-a ṭhuoi ding an ni a; Kanhmun, Saikhawthlir, Zamuang le Khanṭhuam-ah sungkuo pakhat pei, Sihthiang-ah sungkuo 3, Bawngva-ah sungkuo 13 sie ning an tih.

Zomuantlang facilitation centre-ah sungkuo 4 an tlung taa, an rengin mi 23 niin, puitling 20 le naupang pakhat an nih. Zomuantlang pan hai hi Naisingpara camp-a um an ni a, Tuirum khuo le Damparengpui-ah sungkuo 2 ve ve sie ning an tih.

Facilitation centre 2 a hin Bru hai chu Tripura transit camp-a mi an ni le ninaw hai, Mizoram electoral roll 1995-ah an chuong le chuongnaw, raltlan thla hai an ni le ninaw hai endik a ni a, doctor-in an hriselna an endik pek vong bakah an fak ding bufai kg. 20 seng pek an ni bawk.

Facilitation centre-a endik an ni hnung hin Mizoram-a an umna ding khuo-ah ṭhuoi ning an ta, Mizoram-a an umna ding khuo chu Mizoram an suoksan hmaa an umna khuo hai-ah ning a ta, an khuo hai rausan ta hnung ani chun an umna Assembly Constituency huom sung khuo-ah sie ning an tih.

Tripura anthoka Bru kir nuom ṭhenkhat hai hi transit camp anthokin an suok ding mi ṭhenkhatin an dang a, hi lei hin Mizoram-a kir an tlawm pha a nih.

Hienglai zing hin Bru raltlan ṭhenkhat hai chun Mizoram kir nuom loin, sorkar-in an thil phut a suk hlawtling hma chu Mizoram an kir naw ding thu an hril. A kir nuom lo hai laia an hotu Ranjit Reang chun, sungkuo tin kuomah sum ṭhangpuina Rs. 1.5 lakh pei pek ding, Bru hai ta dingin political settlement pek ding le paramilitary sipai hai venhimna kan dit a nih, tiin a hril. An thil ngen le inzom hin zani khan Kanchanpur refugee camp-ah sit-in demonstration an nei bok a nih.


Blog, Updated at: 11:28 PM
© TLÂNGSAM. Powered by Blogger.