UGC-in university hai kuomah NE chanchin inchuon dinga ti

Posted by Lalremlien Neitham

New Delhi, May 02, 2014: University Grants Commission (UGC) chun India ram State tina higher education institute hai kuoma chun an course-ah India hmarsak biel hai chanchin le hnam nunphung hai inṭhangsa tir dingin an hriettir.

Hi chungchanga hin tulai hnai khan India hmarsak tienga inchuklai hai chun Prime Minister kuomah lekha thelutin, India hmarsak mi haiin India hmun hrang hranga an umnaa hai chi inthlierna tieng enhranna an tong dan hai an intlun a, hi baka hin India hmarsak biel chanchin hai chu inchukna in curriculum a hai inchuon ve dingin an ngen bok a nih.

Human Resources Development (HRD) ministry chun tulai hnai khan India hmun hrang hranga India hmarsak mi hai hamṭhatna ngaituo dingin task force hai khom alo indin ta bok a nih.

India hmarsak inchuklai haiin India PM kuoma lekha an thelutnaa chun, higher education institute-a curriculum-ah hmarsak mi hai chanchin chu an ṭawng anthoka English a inletin inchuk thei dingin inchuon nisien tiin an ngen a nih.

Hi baka hin India hmarsak hai history, British opna hnuoia India a um hma anthoka zalenna a hmu chen, chu sikul, graduate le post-graduate a hai inchuk thei dingin curriculum a hai inṭhangsa tir dingin an ngen bok a nih.


Blog, Updated at: 2:44 PM
© TLÂNGSAM. Powered by Blogger.