Modi’n May 26-ah PM thusam nei ding

Posted by Lalremlien Neitham

New Delhi, May 21, 2014: Zani khan India president Pranab Mukherjee chun BJP prime ministerial candidate Narendra Modi kuomah Prime Minister dinga ruot ani na lekha an hlan a, kar thar Thawṭanni May 26 zantieng dar 6 khin Prime Minister sin a chel ding thu insamna nei a tih.

BJP parliamentary party le an thloppui NDA-a party hotu le MP hai chu zani khan an ṭhungkhawma, Gujarat CM nilai mek kum 63-a upa Narendra Modi chu parliament-a BJP le NDA hotu lu dingin an namnghet bok a nih.

Tuta ṭuma BJP haiin Lok Sabha inthlangnaa majority hmua India sorkar-na an chelna ding hi kum 30 hnunga Congress party nilo party dang haiin majority hmua India sorkar-na an chel nawkna a nih.

BJP parliamentary party inhmukhawmna hi Central Hall of Parliament-a nei a ni a, BJP hotu LK Advani’n Modi hming chu parliamentary party hotu lu tak dingin propose-in BJP hotu dang dangin an ‘seconded’ a, Modi chu thlang a nih. Inṭhungkhawm hai chun Modi thlangtlinga a um an lawmpui inentirna’n an dawkan hai chumin “Bharat Mata Ki Jai!” tiin an khek dur dur bok a nih. Inṭhungkhawmna tawp tieng BJP president Rajnath Singh chun Member of Parliament (MP)-a thlangthar hai inngirtirin Modi chu an BJP parliamentary party hotu lu dinga an pom inentirna’n kut an ben tir nghe nghe bok a nih.

BJP hai inṭhungkhawm zo hin, an i keihruoi party hrang hrang inzomkhawm National Democratic Alliance (NDA) hotu le MP hai chu BJP inṭhungkhawmna chu zom nghalin, Modi chu NDA parliamentary party hotu lu dingin an thlang nawk nghal a, an i thlang thu India President kuoma inhriettir dingin Rashtrapati Bhavan tieng an pan nghal a nih.

Rashtrapati Bhavan tuola Modi’n thuthar lawkhawmtuhai an hmupui hun a hin, president-in sorkar-na chel dinga a fielna le PM sin chel dinga a ruotna lekha chu pharin an hmu tir bok a nih.


Blog, Updated at: 8:56 AM
© TLÂNGSAM. Powered by Blogger.