KSO-in Phungzathang an lawm

Kanggui, May 04, 2014: Sadar Hills-a Kuki Students’ Organisation (KSO) hai chun Manipur health minister Phunzathang Tonsing le a minister chanpui haiin Kanggui Community Health Centre (CHC) an hung sir leiin a chung-ah an lawm hle thu an hril a, an hma tienga CHC khom District Hospital-a hlangkai dingin an ngen nghal bawk a nih.

Sadar Hills-a KSO president Thangminlen Kipgen chun thuthar lakhawmtuhai inhmupuiin health minister-in Kanggui CHC sir a, a mit ngeia thil umdan hai hmuin mipui harsatna le CHC mamaw hai a hung hmu chieng leiin a chungah mipui khom an lawm hle thu a hril.

Hilai hmun a hin mihriem khom an pungpei leiin CHC Kanggui chun a sevela mipui hai a enkol hne ta naw thu hrilin, District Hospital-a hlangkai a ṭul thu a hril bawk. District Hospital-a hlangkai ding thu le inzom hin minister a hung ṭum hin lekha khom an pek nghe nghe thu a hril a, doctor khom sie belsa ding le additional CMO khom sie dingin an ngen niin KSO president chun a hril.

Hienglai zing hin KSO chun CHC ṭha tak le tluong taka a fe theina dingin mipui le khawtlang pawl hrang hrang hai chun CHC thuneituhai chu thlop dingin an ngen nghal bawk a nih.