Jiri le Imphal lampui-ah tiemchinlo Chakka Bandh

Tamenglong, May 06, 2014: Manipur sorkin kuoma Tamenglong district sunga lampui siemṭha dinga an ngen chun uksak a hlaw naw lei le CM-in an tiemna tuchena ala sukpuitling naw leiin Tamenglong-a Joint Forum for Transport Welfare (JFTW) chun voizan zanril 12 anthok tiemchin umloin Imphal-Jiribam lampui-ah “chakka bandh” ṭan an tih.

Hi “chakka bandh” ko hin Tamenglong-a PWD office le NF railway construction company hai sinthawna khom huomsa bok a tih, tiin JFTW thusuok chun hril bawk.

JFTW chun, hun sawt tak anthokin Khongshang le Tamenglong district headquarter inkar lampui km 39 a sei chu siemṭha dingin Manipur sorkar a nor taa, tuchen hin siemṭhat ala ni naw zing leiin an lungawinaw inentirna’n “chakka bandh” an ko thu an tarlang a, Tamenglong-a pawl hrang hrang hai khomin bandh hi ko dingin an thlop niin an tarlang bawk.

Hi lampui siemṭhatna ding hin Manipur sorkar chu voi iemanizat ngen an taa, Tamenglong-a pawl hrang hrang hai chun April 17 khan CM kuoma joint memorandum an pek nghe nghe a, CM chun an thil phut chu April 27 chen sukpuitling dinga an tiem hnung khomin tuchen hin la sukpuitling an naw thu an tarlang bawk.

Memorandum an thelut a chun, hi lampui siemṭhatu ding hin State PWD hai niloin BRTF hai chu mawphurna pe dingin an ngen thu an hril bawk.