India-in FIFA a dawr

New Delhi, May 17, 2014: Tulai hnai el khan All India Football Federation (AIFF) president Praful Patel chun FIFA president, secretary general le FIFA-a mi poimaw dang hai inhmupuiin, FIFA inelna tamlem India ram-ah nei thei nisien, tiin a dawr.

AIFF president hin khawvel rambung hrang hranga football club ṭhahai inelna "FIFA Club World Cup" chu India-ah inthlungtir ve dingin a ngen a, kum 2017 le 2018 hai-ah India-ah thlung sien, tiin a ngen nghe nghe a nih.

Patel chun, “Kum hni a dingin ngen a ngai a, ei hlawtling ani chun India ram-ah kum 2017, 2018 le 2019-ah FIFA inelna ei host ding a nih. Ei hlawtling le hlawtling naw thu ruok chu tu kum December thla khin hriet thei ni chauh a tih,” tiin a hril.

“FIFA hin mipui tamna India ram hi a ngai poimaw a, hi rama hin football inthlungtir a nuom a, ṭhang khom a lak nasa hle. European football club hai khomin India hi ‘football bazar’ ṭha tak ni thei dinga an ngai a nih,” tiin a hril bawk.