ILP nei lo dap suok tum

Posted by Lalremlien Neitham

Aizawl, May 05, 2014: Aizawl City Local Council Association (ACLCA) chun, Inner Line Permit (ILP) pek suokna dinga Local Council (LC) hrietpuina pek hlak chu tulai hnaia sorkar-in a nuoibo pek chungthu-ah an lungawinaw thu an tarlang.

ACLCA hin LC hrietpuina ṭhang loa ILP pek suok le ILP nei lo hai dap suokna hnatlang nei an tum thu an tarlang bok a nih.

Kar hmasa Inrinni khan ACLCA chu Dawrpui School Hall, Aizawl-ah inṭhungkhawmin Mizoram puotieng anthoka hung hnam dang ha’n ILP an hnina form-a Village Council (VC) amawni, LC amani hrietpuina an mamaw hlak chu kum bul anthokin sorkar-in a suktawp a, LC hrietpuina lak ngai talo dinga thaw a ni thu an hril.

ACLCA chun, ILP hnina-ah LC hrietpuina pei ani chun Mizo mipuihai himna dingin thil ṭha loa ani thu hrilin, LC hrietpuina lak ngeia ILP pek suok an phut a, an dit dan anga thil thaw ani hma chun Aizawl DC office anthokin ILP pek suok chu suktawp dingin sorkar an phut bok a nih.

ACLCA chun resolution pass-in, LC hai chu sorkar-in thuneina insang lem an pek an dit thu an tarlang a, Aizawl Municipal Council (AMC)-in Licensing Regulation hmang dinga hma a lak mekna-ah No Objection Certificate an pek suokna-ah Rs. 50 la ni ta sien, AMC hnuoia Building Regulation-in a phut anga in bawl thar ding hai kuomah LC hrietpuina an pek hun-ah Rs. 100 lak nisien, in bawl sunzom ding haia inthokin Rs. 50 lak nisien, LC haiin certificate dang an pek suokin man a dingin Rs. 10 lak an tum thu an tarlang bawk.


Blog, Updated at: 5:59 PM
© TLÂNGSAM. Powered by Blogger.