HPC-D (P)-in thusuok siem

Ccpur, April 30, 2014: HPC-D (President)-a info & publicity secretary Jackie Hmar chun thusuok siemin, internet/facebook fethlenga chanchin lo dongtu le thondartuhai kuoma chun ngaituona felfai lema thil thaw ta dingin an inhriettir thu an hril.

HPC-D (P) thusuok chun, Hmar hnam hmaikawr hmanga HPC-D (C) chairman Zosangbera le a rawi haiin Manipur le NC Hills-a Hmar nau mi tam tak that a, an ringhla ta phot intuortira an hringna chen la pek dinga vaudetuhai umdan chu Hmar mipui hai hriet sa ani thu hrilin, “Keini HPC-D (P) mi that ram tuma sipai tha hratna hmanga an chet dan le an chetna po po Hmar mi ram danga um ti lo chun hre vong bok an tih,” tiin an tarlang bawk.

“MLA inthlang (election)-a mi pakhat ṭan bika sum lut ding po lo ban tantu le mipui neksawrtu anni zie mipui hrietsa a nih,” tiin, “Hmar nauhai thattu le neksawrtu hai chu hnam hmangaitu anni chun ei hmabak an thim hle a nih,” tiin an tarlang bawk.

Thusuokin a tarlang peidan chun, HPC-D (P) in hnam sunga inthuruolna le inremna uma, thisen insuo tawp ta sien ti a nuom leia Hmar Inpui hmalakna a nghak zing laiin HPC-D (C) haiin sipai tha hratna hmanga hringna tam tak an lo lak ta thu hrilin, HPC-D (P) chu um tawk tawk thei ding ngirhmuna an um ta naw thu an ziek bawk.

Hmar hnam siemna dinga HPC-D (P) hma lakna a hin Hmar mipui lo chiai lo dingin a ngen tak meu thu hrilin, internet/facebook fethlenga chanchin lo dongtu le thondartuhai chun an ngaituona felfai hmanga thil thaw ta hlak dingin an inhriettir thu an tarlang bawk.