School Education lakah MSU lungawi lo

Posted by Lalremlien Neitham

Aizawl, April 16, 2014: Mizo Students’ Union (MSU), GHQ chun, sorkar sikul le mimal sikul hrang hrang haiin an nuom zat zat inchuklai hai kuomah fee chi hrang hrang an dawl hlak chu thra an ti naw thu an hril a, sikul fee khon dan-ah School Education Department lak-ah an lungawinaw thu an hril.

Zani khan MSU chun thusuok siemin, sikul fee lak dan ding a hin MSU le School Education directorate-in April 29, 2013 khan inremna an lo ziek taa, inrem dan dungzui chun School Education department aiawin director P. Lalchhuanga le joint director JH Biakmawia hai hming ziek a nih.

MSU thusuokin a tarlang danin, School Education department chu an inremna thutiem bawzui thra tawk loin an intum a, sikul hrang hrang haiin an ditdan dana fee an lak khomin insukdik tir nekin hrietnaw tehlem an thaw pek niin an intum bawk. Tukum April thla sung ngeiin School Education department-in a thu intiemhai a suk hlawtling naw chun Mizoram-ah inchukna mumal lem a um theina ding le inchuklai hai le an nu-le-pahai thlavang huol nan ke an pen suok nawk ding thu an hril bawk.

MSU leh School Education deptt. hai inremna chu hiengang hin:

1. Mizoram Fiscal Reforms Committee-in Government School ta dinga fee chawi ding a ruohman/bituk hi revise a hun ta hle a, an rang thei anga ennon a, siem thrat ning a tih.
2. Mizoram sorkar-in permission a pek school po po haiin academic session 2014-15 anthokin inchuklai hai anthokin admission fee le fee dang an lak ding chun sorkar-ah (School Education department) phalna an lak hmasa phot seng ding a nih.
3. Mizoram sorkar hnuoia recognized private school (aided) higher secondary, secondary le elementary haiin academic session 2014-15 anthokin inchuklai hai anthokin admission fee le fee dang an lak ding chun sorkar-ah phalna an lak hmasa seng ding a nih. School Education department hrietpui loa fee dawn hai chu hrem ning an tih.
4. October 2013 thla zo hma ngeia School Education department-in private school hai an ngirhmun enfie a, ‘inspection’ nei ding ti a ni a. School permission pek tah, dan-in a khang standard (condition hrang hrang) pha naw hai, inchukna fepui mumal ta naw hai le inchukna fepui tlak lohai chu an permit cancel pek chenin hma lak ning a tih.


Blog, Updated at: 3:21 PM
© TLÂNGSAM. Powered by Blogger.