Sartuinek-a Truck accident-ah mi 2 an thi a, mi 11 an hliem

Posted by Lalremlien Neitham

CCPur, April 12, 2014: April 11, 2014 (Zirtawpni) zantieng dar 4:30 vel khan Tuiruong le Sartuinek khuo inkarah Phaiphin phur Truck pakhat a accident a, Truck a chuong mi 2 an thi bakah midang 11 an hliem.

Hi Truck accident-a thi mi pahni hai chu Sartuinek khuo mi ve ve - Mrs. Thangṭhuom(57) w/o Rinthang le Mrs. Lalthomawi(51) w/o Lalthlenglien hai an nih. Hliem inrik deu mi pathum hai chu Alipur Hospital panpui an nih. Alipur Hospital panpuia um hai chu Mrs. Zolienkim (60) w/o Lallawm, Mrs. Ronei(32) w/o Khuongremthang le Mr. Rangkhumthang(20) s/o Lalpawllien an nih. Hliem danghai enkawltu dingin bieltu MLA Dr. Chaltonlien Amo le Health Minister Pu Phungzathang Tonsing han Sartuinek khuoah Medical team an tirlut tiin Pu Lalvullien, Social Worker chun report a hung pek.

Dr. Phirthanglien Buhril inrawinaa Medical team hai chun hliem inrik taluo lo mi 8 hai chu Sartuinek khuoah um chilin an enkawl mek niin Sartuinek khuoa in camp mek a hmuna um Dr. Phirthanglien chun report a hung pek. Hliem inrik pathum hai hi zani zingkar dar 9:00 khan Jiribam panpui an ni a, sienkhawm zani ma khan Alipur, Cachar, Assam tieng panpui nawk an ni thu Dr. Phirthanglien chun a hung hril bawk.

Truck neitu hi Pu Roland Ralsun of Vangai a ni a, Truck hin full-loada phaiphin phura Sartuinek khuo a pan lai mek, Sartuinek khaw tlungna ding Km. 1 vela hla na hmuna Culvert siem lai meka diversion road hrawa culvert siem lai a helna lamah changsuola eksiden a ni a, lamthlang ft. 20 vela inthukah an hlumtla niin ei thu dawngna chun a hril. Truck-a hin Sartuinek khaw mi, rama fe In inlawi ding mi 17 vel an chuong niin ei thu dawngna chun a hril a, Pu Lalvullien chun hliemna tuok hi mi 13 niin a hung hril bawk.

Source: Hmasawnna Thar


Blog, Updated at: 8:35 PM
© TLÂNGSAM. Powered by Blogger.