Rel lampui siemna ding ram endik nawk

Posted by Lalremlien Neitham

Aizawl, April 16, 2014: Mizoram sunga Bairabi-Sairang inkar rel lampui siemna dinga Mualkhang V/C huom sunga ram hai chu Anti Corruption Bureau (ACB)-in an thu suina report Mizoram sorkar-ah a thelut ta leiin endik ṭhat nawk an nih.

Ram endikna sin hi Kolasib-a LR & S department-a settlement officer Lalrinawma inrawina hnuoi-ah April 15 anthok khan endik ṭan a nih. Ram endikna a hin ram neituhai chu an ram a hai seng an pass hai leh anlo um a, an thlai nei zathai khom enfel non nawk vong a nih. Endik non na’n a huom ding hi Mualkhang ram sung bik km 7 a sei (Pualhrang vadung le Mualkhang panna lampui inkar) a nih.

Ram endik non ding huom sunga hin ram/huon 149 a um nia hriet a na, April 15 le 16 sung khan ram 50 enfel zo an tah. Ram neitu 3 hai chu zangnadawmna la ve ding hai lai an la ṭhang ve naw ti hriet suok a ni a, zangnadawmna an lak ve theina dingin Kolasib DC-ah dan anga bawzui dinga inhriettir an nih.

Ni 2 sunga ram endikna sin thaw a hin, dan indik loa thilthaw hmu suok an la umnaw a, ram endikna sin hi April 21-ah sunzom nawk ning a tih. Ram endikna sin a hin Revenue department-a sinthawtuhai bakah ACB le North Frontier Railways aiawtuhai khom an ṭhang.
Hienglai zing hin, assessment list-a ram pass-na zieklutna-ah sutsuol a um nuol leiin ram pass leh endik nghal pei a ni a, V/C pass anga tarlang ni si, periodic patta nei an um leiin siem ṭhat nghal vong a nih.

Mualkhang ram sunga hin zangnadawmna la ding mi 149 an um a, chuonghai laia mi 49 hai chu ACB hai chun endik non tula an hriet leiin endik non a nih.


Blog, Updated at: 1:22 PM
© TLÂNGSAM. Powered by Blogger.