Pasal pakhat na taka kap hliem a nih

Posted by Lalremlien Neitham

CCPur, April 16, 2014: Zani (16-4-2014) zan dar 6:30 vel khan CCPur Police Station thlang meta S.B. Hotel, Old Bazar, CCPur-ah tu ti hrietlo silai chawi mi 2/3 vel an va lut a, Hotel sunga um Mr Letkhotinthang Haokip s/o Thangsei Haokip of T. Champhai chu na takin an kap hliem.

Letkhotinthang hi a ring-a kap hliem a ni bakah a khabe/khak khawm silaimu hin a deng hliem bawk. Kap a ni hnung hin Letkhotinthang hi Zenghang Lamka sunga a tlan lut a, Zenhang Lamka mipui han iemanichen an buoipui hnungin CCPur Police han lain District Hospital, CCPur an panpui a, District Hospital-a doctor hai chun RIMS Imphal tieng an refer a, a hliem inrik a, hi thu ei sut chena hin chu a la thi naw bakah Imphal panpui a ni le ninaw ei la hriet nawh.

A hming hi zani zan dar 9:30 vel khan hriet chau a nih. Zani hmasa zan dar 7:30 vel khawm khan T. Champhai khuoah hmelhrietlo silai chawi ṭhenkhatin pasal pahni- T. Alexander Haokip (24) s/o T. Ngampao Haokip of T. Champhai le Thiemkhohao Haokip (25) s/o Thangkhosei Haokip of T. Champhai hai chu an lo kap hliem ta bawk a nih.

Source: Hmasawnna Thar


Blog, Updated at: 1:25 AM
© TLÂNGSAM. Powered by Blogger.