High security plate-ah Meitei hawrop inchuon dinga ti

Posted by Lalremlien Neitham

Imphal, April 19, 2014: Meetei Erol Eyek Loinasillon Apunba Lup (MEELAL) hai chun zani khan thuthar lakhawmtuhai inhmupuiin, Manipur sorkar-in Manipur sunga sorkar le mimal ta inlirthei a hai Meetei Mayek hawropin an number hai inchuonsa an naw chun nuorna an siem ding thu an puong.

MEELAL president Sadokpam Tomba chun, kum 2007 July 26-a MEELAL le Manipur sorkar hai inremna ziek dungzui chun Manipur-a inlirthei po po hai number plate chu Roman script le Meetei Mayek a ziek ding ti a nih, tiin a hril.

Tu chen hin an inremna thuthlung ziek chu sorkar-in a la suk puitling naw zing leiin sorkar kuoma khom lekha an thelut a, sorkar chun ngaisak loin tu chen hin sorkar anthok sangna an la hmunaw thu a hril.

Hi thu a hin May thla chen-ah sorkar-in hma a lak naw chun MEELAL chun nuorna siem a ta, inlirthei hai khom suksiet ning an tih, tiin a hril bawk. High security number plate la nei lo hai chun an number plate a hai Meetei Mayek-in an number hai inchuonsa dingin a ngen bawk.

Hi an nuorna anthok thil ṭhanaw alo thlung ani khomin state sorkar-in mawphur a tih, tiin MEELAL president chun a hril bawk.


Blog, Updated at: 4:07 PM
© TLÂNGSAM. Powered by Blogger.