April 17 khan Aizawl-a Congress Bhavan-ah MPCC le Congress party-a frontal organization haiin emergency meeting an neinaa, Lal Thanhawla chun thu hrilin, K. Chhawnṭhuama le a thokpui haiin EVM sukchingpen an hril hi opposition party haiin andik naw ti hrezing siin an ṭan tlat niin a hril a, “Hi hi mipui hai rorelna, democracy tharuma nek thluk tumna le an party mipuihai hlem tumna a nih,” tiin a hril.
Lal Thanhawla chun, K. Chhawnthuama le a thokpuihai chu sui mek an ni danhai, man an ni danhai hrilin, police haiin nghor taka an sui mek thu le mipui hai suk chi-ai na dinga sum petuhai khom sui mek an ni thu a hril.
Lal Thanhawla chun, Joint NGO ha’n total bandh an huoihot leiin Election Commission-in inthlang hun a son hla dep chu EVM chungchanga inhrilfiena hun ṭha tak ani thu a hril a, EVM sukchingpen thei a ninaw ti chu ECI-in chieng taka a hril hnung khoma, Facebook vela nuom nuoma hril hlak hai chu fimkhur dingin a ngen.
Lalmuanhlua chungchanga a hrildan chun, Lalmuanhlua chu Congress party sor dingin anzor hlak a, ringthlak an naw leiin sor ani ngai naw thu a hril bawk.
